unsa Gschicht

Im Jahr 1989 ham se dö zwoa Briada Willi jun. Und Christian dazua entschlossn, midnand zu Musiziern.

Gsogt und do. Da Willi hod scho Akkordeon gschpuit und fian Christian is a Taifösgeign baut worn. In dem Jahr hams scho bei Familienfeiern und kloane Hoagartn aufgspuit.

1990 wars dann soweit. Da Vadda, der scho Jahrzehnte bei da Oagna Blosmusi de Tuba gschpuid hod, is zur Verstärkung dazua kemma.

Bei an Heimatabend in Kirchham samma dann um an Nam gfrogt worn.

Nach kurzn Überlegn, is dann schließlich der Nam  "Hinterbauernbuam" gfoin. Dös is nämlich der Hofnam, beim Hinterbauern z´Aufhausen, wo da Opa abstammt.

Im Lauf der Zeit san dann nu verschiedene Instrumente glernt worn.

z.B. Harmonika, Hackbrett, Gitarr und Harfn

So hod sich da musikalische Stil verfeinert.

In der Zeit san dö Hinterbauern auf verschiedenen Hoagartn, Heimatabenden, Harmonikatreffen und kloane Festln zum hean gwen.

Es war aa a Teilname am Zwiesler Fink mit 2 Harmonikas und Tuba und Radioaufzeichnungen vom Boarischn Rundfunk in Schierling dabei.

1998 is dann da Willi jun. mit da Martina zsamm kemma und dö heitige Besetzung zu viert war geborn. Den Nam "Hinterbauernbuam" hama natürlich gändert. Da jo iatz a Madl dabei war, sama von do o die "Hinterbauernmusi" gwen.

Heit musiziern mia ois Tanzlmusi mit Harmonika, Harfn, Hackbrett und Tuba.

Oba a ois Stubnmusi mit Harfn, Zither, Hackbrett und Gitarr.

Oda in verschiedenen Zwischnbesetzungen.

Musikalisch moch ma dös ganze boarische Landl auf Hoagartn, Heimatabende, Frühschoppn, Trachtnfesda, Hochzeitn, Geburtstagsfeiern, Volkstänze, kirchliche Verantstaltungen usw. unsicha.

 

 

Da Gewinn dess Zwieseler Fink 2009  war dös schönsde Gscheng zum 20-jährigen vo da Musi. Im April und Oktober 2010 is dös ganze dann gebührend gfeiert worn.

 

A bsundara Dank gebührt an Willi jun. sein Taufpaten, an Hinterbauern Sepp vo Aufhausen (Josef Osterholzer), der uns bis zum heidign Dog den Namen zuagstandn hod.

Sepp a herzlichs Gejts Good.

Mia mechtn uns oba a beim Oagna Trachtnverein, dö Inntaler Buam, bedanga.

Der Verein unterstützt uns scho von Anfang an mit Instrumente und vieles mehr.

Dazua muaß a da Fiagn Franz (Franz Stempfl – Gstanzl Franzl) erwähnt wern.

Er hod uns imma auf seine Auftritt mit gnumma, daß man musikalisch begleitn kinnan.

Ois letzts mecht ma nu an Franz Bauer, an Hanslmuina, danga. Er is uns leida am 11.12.2008 scho vorausganga. Da Franz hod se imma Zeit gnumma und fast nix valangt, wenn wos mit dö Harmonikas oder Akkordeons war.

Franz, mia wern Di nia vergessn!